![Hatua 3 Muhimu Katika Tangazo](https://thamaniacademy.com/wp-content/uploads/2024/01/Hatua-3-Muhimu-Katika-Tangazo-1.png)
Historia ya Kufanya Matangazo Instagram inaanzia mwaka 2013 ambapo instagram ilitambulisha rasmi utaratibu mpya wa kulipia ili kuruhusu Biashara na watu binafsi kufikisha post zao kwa watu wengi zaidi. Wakati huo zikifahamika zaidi kama “Sponsored Posts.”
Hata hivyo, matangazo yote ya awali yalikuwa na uwezo wa kufikia watu wachache sana na ilichukua muda mrefu ili kuanza kupata matokeo kutokana na limits za maeneo ya kuonyesha Matangazo.
Kadri mtandao huu ulivyozidi kukua, ndivyo pia uhitaji wa kufanya matangazo ndani ya platform hii ulivyoongezeka.
Miaka miwili baadae (2015), Instagram ilianzisha utaratibu rasmi wa kuruhusu watumiaji wake kufanya matangazo kulingana na mahitaji yao na aina ya watu wanaotamani kuwafikia.
Uamuzi wa kuruhusu matangazo katika mtandao huu haukuwa rahisi sana. Kwa sababu, waanzilishi wake Kevin Systrom na Mike Krieger, waliogopa kupoteza watumiaji wake ambao wengi waliuzoea kama mtandao wa kushare picha peke yake.
Lakini, kulingana na ushindani wa Kibiashara kutoka katika platform nyingine na uhitaji wa matangazo kuongezeka, wakaona hataa isiwe tabu.
Ikabidi wakubali platform hii iwe sehemu ya kusaidia biashara mbalimbali kufanya matangazo na kuuza bidhaa zao. Huo ndio ukawa mwanzo kamili wa Biashara na watu binafsi kufanya matangazo Instagram.
Mpaka leo, Miongoni mwa platfom zinazotumiwa na wafanyabiashara wengi kufanya matangazo, basi huwezi kuacha kuutaja mtandao wa Instagram.
Kufanya Biashara bila Matangazo ni sawa na kumkonyeza Binti Mrembo gizani. Unajua ni nini hasa unafanya, lakini hakuna mtu mwingine yeyote anaekuona.
Steuart Henderson Britt
Ukitaka kufanya vizuri Instagram na nje ya Instagram, huwezi kukwepa kufanya Matangazo.
Ni lazima Kuendelea Kufanya Matangazo?
Utaendelea kupoteza pesa nyingi kama haujui nini hasa unataka kupitia matangazo yako.
Ukishindwa kufahamu nini unataka kama matokeo ya mwisho ya tangazo lako, basi utakuwa umejiandikia hukumu ya kuendelea kufeli na kuwafaidisha Kampuni ya Meta.
Yes! Wakati wewe haujui kile unachokitaka, wao wanajua nini wanataka kutoka kwako. Wanaitaka sana pesa yako ya Matangazo bila kujali kama umepata faida au hasara.
Kila matokeo mazuri katika Biashara, yanahitaji malengo yanayoeleweka na maandalizi yanayoendana na ukubwa wa aina ya matokeo unayoyahitaji.
Sio rahisi kuweka pesa tu kwenye kadi yako ya Matangazo na Kuchagua picha nzuri kwenye ukurasa wako, kisha ukakaa na kusubiri wateja lukuki.
Kila kitu kinahitaji maandalizi, kuanzia kuchagua aina ya Bidhaa, aina ya watu unaotaka waone tangazo, location yao, kiwango cha gharama cha kumpata mteja mmoja, kiwango cha bajeti yako, idadi ya siku za tangazo lako kuwa active nk. Kila kitu kinahitaji maandalizi.
Lakini …
… kabla hujafika katika hatua hiyo, ni muhimu kwanza ujibu swali la kwanini unataka kufanya Tangazo hilo?
Hizi ni sababu 3 kubwa za kwanini unapaswa kuendelea kufanya Matangazo katika Biashara yako;
1. Kufahamika zaidi: Kufanya matangazo Instagram, itakusaidia sana kuongeza nafasi ya brand, bidhaa au huduma zako kuwafikia watu wengi wapya.
Kuna kundi kubwa sana la wateja hawakufahamu na hawajawahi kabisa kusikia kuhusu Brand yako. Matangazo yaliyofanywa kwa usahihi yatakusaidia kuwafikia watu hawa.
2. Nafasi ya Kupata wateja wapya: Miongoni mwa njia nzuri za kuvutia na kunasa wateja wapya sokoni, ni kupitia Matangazo.
Lakini, ili uweze kufanikiwa zaidi, ni muhimu sana kuchagua na kuanisha ni aina gani ya wateja unataka waone na kufikiwa na tangazo lako.
Muhimu zaidi, ni kuwa na uhakika kwamba, watu hao wanakiu na Bidhaa au huduma yako na wana uwezekano mkubwa wa kununua.
3. Kuongeza Mauzo: Furaha kubwa ya kila mfanyabiashara, ni kuona mauzo yanaongezeka. Au Furaha yako ni tofauti na hii?
Katika ulimwengu wa sasa, matangazo ni ni sehemu nzuri sana ya kukuongezea mauzo katika Biashara yako kama tu utayafanya kwa usahihi.
Iwe ni wateja kununua moja kwa moja kupitia ukurasa wako wa Biashara au kufika kabisa dukani au ofisini kwako, tangazo zuri linaweza kumshawishi mteja kuchukua hatua kubwa katika Biashara, ambayo ni kufanya manunuzi.
Hatua 3 Muhimu za Kila Tangazo
![Hatua 3 Muhimu Katika Tangazo](https://i0.wp.com/thamaniacademy.com/wp-content/uploads/2024/01/Blog-Featured-Images-Instagram-Post.png?resize=640%2C640&ssl=1)
Nimezungumza hapo juu, lengo kubwa ya kufanya matangazo Instagram ni kufikisha bidhaa au huduma yako kwa watu wapya, wasiokufahamu wewe au Biashara yako.
Maana yake…
Kuna asilimia ndogo sana za watu hawa kufanya uamuzi wa kununua kwa sababu ndio kwanza unaoneka katika macho yao kwa mara ya kwanza.
Ndio maana, kuna umuhimu wa kuzifahamu hatua hizi 3 katika kila tangazo lako.
Hatua ya 1: Kutengeneza Mazingira ya mteja Kukufahamu zaidi – Awareness
Hatua hii ya kwanza inajumuisha kila kitu unachohitaji kufanya ili kuvuta attention ya mteja wako. Kumfanya aache kuperuzi kurasa au Matangazo ya watu wengine, na kubaki kusoma au kusikiliza Tangazo lako.
Katika hatua hii, mteja hajui chochote kuhusu wewe, brand, bidhaa au huduma zako.
Kazi yako kubwa ni kutengeneza content nzuri katika ukurasa wako, headline inayoshawishi katika tangazo, kutumia picha zinazovutia…
… na caption itakayomfanya mteja wako aache kila kitu alichokuwa anakifanya online na kuangalia au kusoma Tangazo lako.
Lengo kubwa hapa, ni kuhakikisha mteja anafahamu kuhusu ujumbe au bidhaa yako.
Kama hakuna anaekufahamu, basi hakuna atakaenunua bidhaa au huduma zako. Hakikisha wanakufahamu vizuri kwanza!
Nikitumia mfano huu, nadhani utanielewa zaidi …
Chukulia awamu hii kama siku ya kwanza umekutana na Binti mrembo au Kijana Mtanashati. Ndio kwanza umemuona kwa mara ya kwanza.
Hakuna anaemfahamu mwenzie, na kulingana na vigezo vyako na jinsi alivyo, unaweza kuchagua kuzungumza nae ili umfahamu zaidi au ukaishia kumtazama tu na kumuacha aende zake.
Hatua ya 2: Kutengeneza Mazingira ya mteja kukufikiria – Consideration
Unapokutana na Binti mrembo kwa mara ya kwanza na ukavutiwa nae, anaweza kukubalia siku hiyo hiyo?
Kijana wa Mungu najua amesema HAPANA.
Lakini kama ni kijana wa hovyo, najua moyoni mwako umesema NDIO! Kwa sababu “Hawezi Kuchomoa Mistari yangu.”
Hahahahahahah! Natania tu.
Vipi na upande wa pili …
Unapokutana na Kijana mtanashati kwa mara ya kwanza, na akakuvutia pia. Unaweza kufunga nae ndoa siku hiyo hiyo?
Mara nyingi katika matukio haya mawili, jibu huwa ni sentensi ndogo yenye herufi 13 tu…
“Nitakufikiria”
Unadhani ni kwanini unaambiwa “Utafikiriwa?”
Ni kwa sababu anahitaji kukufahamu zaidi na kujiridhisha kwa kile alichokiona.
Baada ya mteja kukufahamu na kupata attention yake, tengeneza mazingira ya kukufikiria na kutamani kuipata bidhaa au huduma yako.
Mfanye aiweke bidhaa au huduma yako katika malengo yake.
Mpaka wakati huo, mteja anaweza akawa tayari amekuja DM au amekupigia simu. Hizi ni ishara kwamba, anaonyesha kutamani kupata Bidhaa au Huduma yako.
Hapa unapaswa kutoa taarifa za kutosha kuhusu Bidhaa au huduma zako, kuonyesha faida zake, na kuonyesha namna bidhaa au huduma yako itakavyotatua matatizo ya mteja wako.
Kutoka katika mfano wa kwanza…
Baada ya kuvutiwa nae, ukamfuata ili kutengeneza mazungumzo na mkapeana muda wa kufahamiana zaidi.
Sasa kila mtu anamfahamu mwenzake angalau kwa uchache.
Unafahamu baadhi ya tabia zake, familia, kabila, malengo au mambo anayopenda na yale asiyopenda.
Unaanza Kufikiria na kuwaza kama atakufaa au lah.
Hatua ya 3: Kutengeneza mazingira ya mteja kuchukua hatua – Action
Hatua ya Mwisho katika kila Tangazo, ni mteja kuchukua hatua kulingana na maelekezo katika Tangazo lako.
Baadhi ya hatua hizo ni pamoja na kununua Bidhaa yako au kufollow ukurasa wako ili aendelee kuona zaidi bidhaa nyingine.
Jitahidi sana katika kila tangazo, unamwambia mteja wako nini hasa anapaswa kufanya baada ya kusoma kile ulichomwandikia.
Tukiendelea kutoka mfano wa pili…
Baada ya kila mtu kumfikiria mwenzake na kujiridhisha, kuna mambo mawili…
- Kuendelea katika hatua zinazofuata katika mahusiano au
- Kuishia katika kufahamiana tu.
Ndivyo inavyotokea pia katika Biashara yako kila wakati unapofanya matangazo.
Mteja anaweza kufikia hatua nzuri ya kununua au anaweza kuishia ku-like tangazo na kuendelea na shuguli zake nyingine.
Bonyeza hapa kama bado unapata changamoto katika Kufanya Matangazo yako Mtandaoni.
Utajifunza kwa usahihi, hatua kwa hatua, jinsi ya kufanya matangazo mtandaoni, na kuanza kupata faida badala ya hasara kila siku.
Utapata Faida au Hasara gani kama utaendelea Kufanya Matangazo?
Saikolojia ya kila binadamu inamwelekeza kuitazama dunia na matukio yanayoendelea katika maisha yake kwa kuyagawa katika pande mbili, uzuri vs ubaya au hasi vs Chanya.
Aina hii ya fikra kitaalamu inaitwa “dualistic thinking.” Inakupelekea kutambua kwamba, asilimia kubwa ya kila kitu kina upande unaovutia na upande usiovutia.
Kuanzia aina ya simu uliyoshika hapo mkononi, nguo uliyovaa, na kila unachokimiliki hapo ulipo, kwa kutambua au bila kutambua…
… umekichagua kwa sababu ya kuangalia upande mzuri utakaokupa Furaha na sio huzuni au kukufanya ukose Amani.
Watu wengi tunapenda sana upande mzuri wa kila kitu.
Hatupendi kabisa kuusikia upande wa pili kwa sababu ya Hofu ya kile kitakachotokea baada ya kufahamu ukweli.
Lakini, ni dhahiri shahiri kwamba, kila kitu kina upande wake unaovutia na usiovutia pia.
Hasara za Kufanya Matangazo Instagram
- Ushindani
Uwezo wa kila mtu kufanya matangazo Instagram, imetengeneza fursa kwa kila biashara na watu binafsi kutengeneza aina tofauti tofauti za matangazo ili kufikia watu na wateja wapya.
Hata hivyo, ongezeko la ushindani kwa ajili ya kuvutia na kushawishi wateja, imeleta changamoto kwa baadhi ya biashara kushindwa kufikia malengo na maratajio yao kupitia matangazo ya Instagram
Kadri biashara nyingi zinavyowekeza katika kufanya matangazo Instagram, gharama za matangazo zinaongezeka pia…
… na kuongeza ugumu kwa biashara zenye bajeti ndogo kushindana kwa ajili ya kupata nafasi ya kutangaza bidhaa zao na kufikia watu wengi. Kitaalamu inaitwa “Ad space.”
Maana yake unahitaji kutumia bajeti kubwa ili tangazo lako liweze kuwafikia watu wengi. Bajeti yako ikiwa ndogo sana, ni vigumu tangazo lako kufika mbali.
Kwa sababu, kuna watu wengi wanapambana ili kupata nafasi (Ad Space) ya kuonyesha Bidhaa zao kwa watu wengi zaidi.
Ugumu unaongezeka kama watu hao wanatangaza Bidhaa au Huduma kama yako na wameweka bajeti kubwa kuliko wewe.
Mfano: Wewe umeweka $10 kutangaza Bidhaa yako, halafu kuna mfanyabiashara mwingine ameweka $30 kwa ajili ya kutangaza Bidhaa ya aina hiyo hiyo.
Huyu mwenye $30 atakuwa na nafasi kubwa zaidi kuliko wewe.
- Uchovu wa Kuona Matangazo
Kila unapoingia Instagram, huwa unakutana na matangazo mangapi?
Kati ya Matangazo yote unayokutana nayo, huwa unabonyeza ili kuangalia matangazo mangapi?
Kwa sababu ya wingi wa matangazo anaokutana nao mteja unaemtafuta, inaweza kuwa vigumu kuona tangazo lako na kuchukua hatua.
Hali hii, inaweza kupelekea Tangazo lako kutofanya vizuri. Kitaalamu inaitwa “Ad Fatigue.”
Ni ile hali ya mteja unaetamani kumfikishia tangazo lako, kukosa interest na tangazo lako, kwa sababu tayari ameshakutana au kuona matangazo mengi yanayofanana na bidhaa yako.
Kama umewahi kufanya matangazo Instagram, utakubaliana na mimi kwamba kuna wakati unaweza kufanya tangazo ukaishia kupata likes tu bila matokeo mengine yoyote.
Kuna wakati mwingine, anaweza kufanya tangazo la bidhaa ile ile, lakini akapata engagement nzuri na matokeo mazuri zaidi.
Kitu pekee kinachoweza kukusaidia, ni kuboresha matangazo yako. Kuanzia muonekano wake, targeting zako, na uandishi wa caption zako.
Muhimu zaidi, jaribu kutumia aina tofauti tofauti za matangazo.
Usikariri kutumia picha hizo hizo za bidhaa zako kila siku.
- Fursa finyu ya Kuchagua Malengo sahihi
Pamoja na urahisi wake wa kufanya matangazo, Instagram inakupa machaguzi machache sana wakati wa kuanza kutengeneza tangazo lako.
Kama utatumia applicaion kufanya matangazo Instagram, utakutana na machaguzi 3;
- Profile visits – Watu watembelee Ukurasa wako
- Website visits – Watu watembelee link ya website yako
- More messages – Watu wakutumie DM au meseji whatsapp
Kwa sababu ya ufinyu huu wa kuchagua malengo, kama usipokuwa makini, unaweza kushindwa kufikia watu sahihi, kupata matokeo sahihi na mwisho wa siku kupoteza bure pesa zako.
Kwa mfano: Kama unauza bidhaa za watoto, tangazo lako linaweza kuwafikia watu wasio na watoto au vijana ambao bado hawapo katika umri wa kuwa na watoto.
Maana yake, ni kwamba kuna pesa nyingi sana utaendelea kupoteza kwa tangazo lako kuonekana kwa watu wasioweza kununua bidhaa yako.
Suluhisho ni kutumia platform nyingine kama “Meta Ads”, zinazoweza kukupa uwanja mpana wa kuchagua malengo, kukusaidia kuwafikia watu sahihi, na wenye nafasi kubwa ya kununua Bidhaa au huduma yako.
Faida za Kufanya Matangazo Instagram
- Uwezo wa Kutengeneza Aina Tofauti Tofauti za Matangazo
Instagram inakupa uwezo wa kufanya matangazo katika aina tofauti tofauti na kila moja ina matumizi na faida yake.
- Aina ya kwanza ni matangazo ya Picha: Unaruhusiwa kutumia picha zenye ubora kuonyesha bidhaa au huduma zako.
Matangazo ya aina hii ni muhimu sana kwa sababu yanakupa fursa ya kuonyesha bidhaa zako, ofa zako na kufanya promotion ya bidhaa au huduma zako kwa urahisi.
- Aina ya pili ni matangazo ya video: Unaweza kutengeneza video fupi fupi (Reels) na video ndefu kwa ajili ya kuelezea au kuonyesha Bidhaa au huduma zako.
Mfano, Kuonyesha behind the scenes, au matumizi ya bidhaa au huduma zako.
- Aina ya tatu ni matangazo ya picha zaidi ya moja katika post moja (Carousels). Haya yanakuruhusu kuonyesha picha na video mbalimbali za bidhaa au huduma zako katika post moja.
Mfano, unaweza kutumia kuonyesha angle tofauti tofauti za bidhaa yako. Kwa hiyo, unakuwa na tangazo moja lenye picha 1 – 10 ili kuonyesha bidhaa yako.
Hata hivyo, hivi karibuni wameongeza aina nyingine ya matangazo. Unaweza kufanya matangazo Instagram kupitia Insta story.
Maana yake unaweza kuboost post zako unazoweka insta story na kuwafikia wateja wako kwa urahisi.
Uwepo wa hizi aina tofauti za matangazo, ni fursa kwako ya kuchagua ile inayokufaa kulingana na mahitaji yako ili kukusaidia kufikia malengo ya tangazo lako.
Hakuna wakati bora zaidi katika biashara yako kama wakati huu.
Tumia vizuri fursa hii kwa kuhakikisha unajifunza namna sahihi ya kufanya matangazo Instagram ili uweze kupata wateja na kuuza bidhaa zako. Unaweza kujifunza zaidi hapa.
- Gharama Ndogo ya Kufanya Matangazo
Moja ya faida kubwa ya kufanya matangazo Instagram, ni unafuu wa gharama za kufanya matangazo.
Ukilinganisha na mitandao mingine, Instagram ndio mtandao pekee unaokusaidia kufanya matangazo kwa gharama nafuu zaidi.
Unaweza kutengeneza Tangazo lako ndani ya dakika chache sana, na hii ni fursa kwa kila biashara bila kujali kama ndio unaanza na followers wachache au una idadi kubwa ya followers.
Una uhuru wa kuchagua bajeti inayokufaa kulingana na uwezo wako.
Kiwango cha chini kabisa cha kufanya Tangazo ni kuanzia $1 ambayo ni sawa na Tsh 2,513 mpaka wakati huu ninapoandika makala hii.
Soma hapa: Siri ya Kutengeneza Bajeti Sahihi ya Matangazo yako.
Hii ina maanisha kwamba, unaweza kutest aina tofauti tofauti za matangazo, ili kuona ni matangazo ya aina gani yanakupa matokeo mazuri zaidi.
Baada ya hapo sasa, unaweza kuongeza bajeti yako kulingana na mahitaji yako.
- Urahisi wa Kufuatilia Matokeo ya Matangazo yako.
Kuna msemo maarufu sana wa Kiswahili, unasema “Mali bila daftari, hupotea bila Habari.”
Maana yake, kama hakuna unapoandika taarifa mbalimbali zinazokuhusu, ni ngumu sana kufahamu maendeleo yako, na kuna uwezekano mkubwa wa kupata hasara au kufeli.
Hivyo hivyo katika matangazo yako…
Kama hufuatilii maendeleo yako, huwezi kufahamu ni matangazo gani yanakupa matokeo mazuri zaidi na yapi unapoteza pesa.
Moja ya sifa kubwa ya matangazo ya Instagram, ni kukupa uwezo wa kufuatilia performance ya Matangazo yako hapo hapo.
Kupitia Instagram Insights au Meta Ads (Ads Manager), unaweza kuona performance na matokeo ya kila tangazo lako.
Hii itakusaidia sana kufahamu ni wapi unafahnya vizuri, na wapi unahitaji kuboresha zaidi.
Epuka sana kufanya matangazo mfululizo bila kufuatilia na kufahamu performance ya kila tangazo na matokeo unayoyapata.
Uwepo wa Instagram umeleta mageuzi makubwa sana katika namna biashara zinazofanya matangazo.
Kutokana na urahisi wake wa kutengeneza tangazo, mpaka uwezo wa kufuatilia na kuona namna tangazo lako linavyofanya kazi.
Matangazo ya Instagram yamekuwa kimbilio la wafanyabiashara wengi sana hapa Tanzania na duniani kote.
Kadri Mtandao huu unavyozidi kukua na kupata umaarufu…
… ni wazi kabisa fursa yake ya matangazo itakuwa sehemu ya suluhisho na hitaji muhimu sana la kila biashara inayotaka kufikia wateja wengi na kuuza bidhaa au huduma zake.
Kama wewe ni mfanyabiashara, na unapata changamoto kuuza bidhaa zako au kupata wateja, basi anza kutumia matangazo ya instagram kwa usahihi.
Pamoja na changamoto zake, bado matangazo ya instagram yanaweza kukusadia sana kutengeneza jina kwa ajili ya bidhaa au huduma zako na kujenga jamii ya watu watakaokuwa tayari kununua bidhaa au huduma zako wakati wowote.
Uwe na Weekend njema.
– Ansey
PS: Kwa mara nyingine tena, kama unatamani kujifunza kufanya matangazo kwa usahihi na kutengeneza mazingira ya kupata wateja na sio likes tu, basi bonyeza hapa na utapata package nzuri inayokufaa kwa ajili ya Biashara au Huduma yako.